ساعة عصرية

ساعة عصرية 

حكاوي بالعامية 

بقلم : محمد فتحي شعبان 

الحلقة الحادية والعشرون 

أسعد الله حياتكم ورزقكم الخيرات وصب عليكم البركات وجعل عيشكم هناء وجمع شملكم وغفر ذنوبكم وتقبل منكم الطاعات آمين .

الموضوع اللي حكتب عنه هنا كنت حنكتبه بالفصحي لكن عدلت رأيي وخليته في ساعة عصرية وكان عنوانه ( الحرية ...التحرر...الخروج عن الأديان والشرائع ) ...

أنا حرة رواية للأديب إحسان عبد القدوس صدرت سنة ١٩٥٤ بتدور حول أمينة وهي بطلة الرواية وخروجها وتمردها علي العادات والتقاليد وده كتقرير لكتاب قاسم امين حرية المرأة ، الحرية كلمة براقة وجذابة كلمة زاهية تجذب أي إنسان لأن كل إنسان يبحث عن الحرية وإنه يتصرف زي ما هوة عايز بدون قيود أو معوقات .

الحرية من الألفاظ اللي ملهاش تعريف واضح ولكنها في اللغة تعرف :  هي الخلوص من الشوائب كالذهب الحر الخالص الذي لا يشوبه معدن آخر ، وتعرف في علم النفس بأنها القدرة علي تحقيق الفعل ، دون خضوع لتأثير قوي باطنة سواء كانت البواعث ام الدوافع وكان تعريفها في الموسوعة الميسرة في الأديان والمذاهب والأحزاب المعاصرة إنها تحرير الإنسان من أشكال العبودية لغير الله تعالي ،كافة سواء ما كان منها للشهوات أو الأهواء والمذاهب والوثنيات أو للأفكار التي تتعارض مع التوحيد الخالص .

أما تعريفها في الفكر الغربي : إنسلاخ الفرد من كل ما تعارف عليه المجتمع من آداب وقوانين لتحقيق أقصي رغباته وشهواته دون قيد أو شرط أو إكراه من أي جهة كانت ، وللحرية تعريفات تانية وتقسيمات مش مجال الحديث عنها ولا مكانه .

كدة نقلت ليكم بعض تعريفات الحرية ولكن إيه معني أنا حر وايه هية الحرية ....الحرية اللي  صدرها لينا الغرب عن طريق الليبرالية وعايزينا نعتقدها وتبقي دين لينا إنك تبقي حر من كل شىء حر من دينك وعاداتك وتقاليدك ( طبعا أنا بقصد هنا العادات والتقاليد الغير مخالفة للدين ) يعني اعمل اللي انا عايزه وقت ما أنا عايز أي حاجة بقي مش مهم المهم إن اعمل اللي انا عايزه ، وده معناه عندهم ( إن الله له الخلق وليس له الأمر ) يعني أيه يعني ربنا خلقنا وخلاص المهمة انتهت علي كدة وإحنا نعمل اللي في خيالنا بقي ، شهوات وأهواء ورغبات الخ الخ منقيدش بقيد يعني حرية مطلقة ولكن عند التطبيق بيبقي عبد لشهواته ورغباته وأهوائه بيبقي عبد لكل شىء هوة عايزه ، لأن الحرية المطلقة ملهاش وجود علي أرض الواقع فالإنسان عبد لله سواء بإرادته أو غصب عنه ، أما الحرية في مفهومنا فهي إنك تكون عبد لله ودي أسمي وأعلي درجات الحرية لأنك بتكون حر من كل شىء إلا أن تكون عبدا لله سبحانه وتعالي فالله له الخلق والأمر ، وبكدة أنت بدل ما تكون عبد لكل شىء بتكون عبد للي خلقك بس ، ليه لأنك بتبقي علي يقين إن كل شىء بايده فما مش بتخاف من شىء ومش بتخضع لشىء من شهواتك ورغباتك بل أنت منقاد لله ولله فقط ، فمعني إني حر إني عبد لله فقط ،مش عبد لكل ما سواه .

نقطة تانية مهمة وهي الممانعة يعني أيه يعني يكون عندي من العلم اللي اقدر أميز بيه الحق من الباطل عندي خط دفاع اقدر اصد بيه الشبهات لانهم لما معرفوش يحاربونا بالشهوات أو مقدروش يحاربوا قطاع كبير بالشهوات بدأوا يحاربوهم بالشبهات والأفكار وده الغزو الفكري اللي نجحوا فيه لحد كبير ، يعني الناس كانت بتعمل المعاصي والذنوب وهم مقرين إن دي معاصي ونفسه مش راضية ، لكن مع الغزو الفكري بيقت الناس بتعمل المعاصي والذنوب وهية معتقده إن الأمر عادي حرية ، وعنده تأويل وتفسير لكل شىء حتي الكفر البواح .

يوشك العالم أن ينجو وإن كان عاصيا و يوشك الجاهل أن يهلك وإن كان عابدا ...فكر في الجملة دي كويس ولينا قعدة مع بعض بإذن الله