ساعة عصرية ...الحلقة الخامسة والعشرون

ساعة عصرية 

حكاوي بالعامية 

الحلقة الخامسة والعشرون 

بقلم : محمد فتحي شعبان 

اهلا وسهلا بكم ادام الله سعدكم ورزقكم الخيرات وصب عليكم البركات ، مازالت ساعة عصرية هي مهربي من كل الاحداث التي تحيط بي فهنا استطيع التحدث علي سجيتي بدون تحفظ .

هلا والله اكتر من مرة اكتب وارجع احذف تاني وارجع أكتب والموضوع كبير ،بنسي ساعات كتير كنت عايز أكتب ايه  ، أو بعد ما ابدا الكتابة الموضوع ميعجبنيش أو لما يبقي كل شىء تمام وابدا أكتب ،الاقي أم سفيان شابطة في العيال وبتزعق والبيت يبقي هرج ومرج ويسيل العرق ، واسيب الكتب والكتابة واطلع اشوف أم سفيان وفي الاخر بطلع أنا اللي غلطان معي اني مكنتش موجود في الموضوع اصلا ، بس حنعمل ايه حكم القوي علي الضعيف .

المهم بقي يا سيدي نحن في أزمة ، سعر الدولار ارتفع وكل حاجة بالتالي حترتفع اللي ليه علاقة بالدولار واللي ملوش علاقة ، ما هية هيصة ومحدش عارف حاجة، السولار والدولار اكتر حاجتين بياثروا في الأسعار ولسة الناس مشفتش حاجة ، الكل بيقترح حلول علي الورق والكل بيتكلم ويقول كلام حلو جدا لكن ...العقليات هي هي المفاهيم هي هي احنا محتاجين نغير العقليات والمفاهيم ،الرؤية للمستقبل احنا رايحين علي فين ، لكن طول ما العقول والمفاهيم متغيرتش حتفضل الأزمة موجودة ومش حيكون في تغيير .

قلت قبل كدة إن أهم عامل في التغيير هوة العودة إلي الله ، لأن الله لا يغير ما بقوم حتي يغيروا ما بأنفسهم ، طيب حتلاقي اللي بيقول هو أنا حغير الكون ، لا طبعا انت مش مطالب انك تغير الكون لان ده مش في قدرتك ، أنت مطالب تغير من نفسك عليك بنفسك أولا ، ثم ما علي الرسول إلا البلاغ مع مراعاة طبعا المصالح والمفاسد وفقه المصالح والمفاسد باب عظيم ، ما عليك إلا إلقاء النصيحة وكل شىء علي الله ، لا بد إن قلبك اولا ينكر المنكر لان لو قلبك منكرش المنكر مش هتعرف الصح من الغلط لأن قلبك خلاص مبقاش عارف حاجة .

أنا النهاردة والآن أمام محكمة الجنايات حكايات كتير بتتحكي ، مفيش حد بيطلع نفسه ظالم الكل مظلوم ، ولكن كل انسان ظالم بشكل ما من الأشكال ، ظالم لنفسه أو لغيره هي الحياة كدة ده اللي ديما بيتقال ، هي دي الدنيا دنيا بتغر أصحابها .

شنطة حمزة ...

حمزة مين صاحب الشنطة ، حياتنا عبارة عن شنطة مليانة كراكيب وورق ملوش لازمة وحكايات كتير جوة الشنطة ، الشنطة دي محتاجة ترتيب وانك تستغني عن بعض الحاجات اللي فيها وترميها عشان تقدر تكمل ، لأن الشنطة كدة حتبقي مليانة ومزحومة علي الفاضي ، روقها واملاها بالحاجات المهمة بس ، كل اللي مش مهم ارميه برة الشنطة ، وانا فعلا محتاج ارتب شنطة حياتي .

صباحكم سعادة ورضا من الرحمن