ساعة عصرية

ساعة عصرية 

حكاوي بالعامية 

الحلقة الثلاثين 

بقلم : محمد فتحي شعبان 

صباح الخير ، جعل الله حياتكم خيرا وسعادة وصرف عنكم كل سوء ورزقكم كل خير ...قولوا اميين .

المهم بقي كنت اتكلمت قبل كده عن موضوع الوكالة و الحمامات ، طبعا الموضوع مش الحمامات ولكن الفكرة والمفهوم العام اللي احنا قلنا عليه ( ثقافة المغلوب وسقوط المنظومة ) ، احنا اتكلمنا عن الطرف الأول اللي هوة متولي النظافة والصيانة ، نتكلم بقي عن الطرف التاني اللي هوة نحن الشعب ، يعني الناس اللي شغالين في الوكالة ، الشيالين والسواقين وأصحاب المحلات وكل من يستخدم ذلك المكان ، مثلا تلاقي اللي داخل الحمام بيهبد الباب باقصي درجة ، تسمع صوت الطرقعة ، البيبان الحديد اتكسرت من الرزع والهبد ، الحنفيات بتتسرق والخراطيم بتتسرق ، احيانا بيكسروا الحنفيات حتي شبابيك الحمام مخلوعة ومش موجودة ، لما تدخل الحمام تحس ان أنت في الشارع ، منك للهواء الطلق ، وغيره وغيره المعني وجود سلبية وعدائية في استخدام الأموال العامة ، مفيش شعور إن دي أموالهم وأنها موجودة لمصلحتهم ، فقدان الانتماء بيعمل اكتر من كدة ، اي نعم فقدان الانتماء أنا مش حاسس ان دي حاجتي وان المال ده مالي ، مش عارف اقولها ازاي ، لكن دي مشكلة كبيرة ...تخريب الأموال العامة سواء كانت حديقة عامة ...حمام عام ....الشوارع ...أعمدة الإنارة وغيره ، المشكلة هنا بين البلد وبين الشعب وكل لبيب بالإشارة يفهم .

ساعة عصرية بنعرف نفضفض ونتكلم زي ما أنا عايز ، ليا كام يوم وصلت لحالة نفسية مش حلوة ، توقفت عن العلاج الاكل قل جدا ، ومفيش نفس لأي حاجة ، القراية متوقف أو شبه متوقف عنها ، ومش عارف اعمل ايه ، بحاول اطلع من الحالة النفسية دي لكن مش عارف .

صباح الفل اهلا وسهلا اخباركم ايه ، السوق الايام دي في حالة توتر وعدم استقرار ، اسعار الخضار والفاكهة ما بين ارتفاع وانخفاض بيحصل دروبات في الأسعار صعبة ، مثلا البامية امبارح كانت ب ٣٥ جنيه و النهاردة ب ٢٥ جنيه ، كمان اسعار البصل ، الخوخ ، الطماطم ، الوكالة من امبارح مش مستقرة والسوق شبه فاضي ، التجار قلقانين يشتروا خايفين من الخسارة ، وده لأن الخضار مينفعش يبات يوم واتنين ، لازم يتباع في نفس اليوم او تاني يوم باقصي حد ، وكمان بيتباع بسعر أقل ، والوكالة صورة مصغرة من جميع الأسواق في البلد .

صباح الخير