ساعة عصرية

ساعة عصرية 

حكاوي بالعامية 

الحلقة واحد وثلاثين 

الحاجة رزة 

بقلم : محمد فتحي شعبان 

مسا مسا علي الناس الكويسة ، اهلا بكم ايها السادة الكرام , 

الحاجة روزة ( مفرد أرز ) دي تبقي جدتي ام ابويا ، اسمها الحقيقي هانم ندا ، من عائلة ندا في رشيد ، كانت قصيرة جدا وفي نفس الوقت شديدة وقوية ، اقصد صاحبة شخصية قوية ، فاكرين فاطمة تعلبة حاجة كدة زيها ، مش عارف ايه اللي مخليني احكي عنها ، لكن أنا حتي في البيت بحكي عنها دايما ، هي كانت شخصية قوية فعلا ، ماتت كان عمرها قريب من المئة سنة ، كانت متزوجة قبل جدي وكان عندها بنتين وولد ، واتوفي ابوهم واتجوزت جدي ، وخلفت منه ثلاث اولاد منهم واحد اتوفي قبل وفاة جدي وبعدها بسنة جدي اتوفي ( كده مدوباهم اتنين ) ، وبعد كدة اتجوزت الجوازة التالتة ، لكن مطولتش واطلقت ( نفد بجلده حاكم هي بتاكل الرجالة ) ، جدي ابو ابويا بقي ، أبوه جه مهاجر من تونس واتجوز مصرية وعاش هنا في اسكندرية ، وجدي واخواته طبعا بقوا مصريين واستقرت بيهم الحياة في اسكندرية ، عاشوا فترة طويلة في بحري في السيالة ، وبعدين اتنقلوا لأبوقير ، وبعد وفاة جدي عاشوا في المكس ، رحلة طويلة ، اتوفي عمي وعمتي وابويا في حياة جدتي ، كان في أحفاد من احفادها جدود وهي عايشة .

الكلام مش لمجرد الحكاوي أنا قصدي نظرة المجتمع للست لما تتجوز اكتر من مرة وازواجها يموتوا ، يعني بتبقي نظرة تشاؤم ، ورغم كدة اتجوزت للمرة التالتة وكمان أطلقت ، فيعني حالة نحس زي ما بيقولوا ، رغم كدة كانت عايشة عادي ، قوية ...شديدة...قدرت تربي خمس أبناء ايتام من رجلين ويعيشوا كأنهم اخوات أشقاء مفيش فرق ، عاشت فترة طويلة في الجبل في عزبة الصيادين في المكس ، كانت عايشة في كهف ، واللي من المكس أو عارف اسكندرية وعارف عزبة الصيادين اكيد شاف الكلام ده ، رغم أن كان ده من زمن قديم ، ليه الناس بتتشائم من الست لما تتجوز اكتر من مرة وازواجها يموتوا ، هي ذنبها ايه ، السيدة أسماء بنت عميس اتجوزت اكتر من مرة وازواجها ماتوا واللي بيقرا في السيرة يعرف كدة ، رغم كدة مكنش في حد بيتشائم منها ، لا حد بيقول بتاكل الرجالة ولا حد بيقول دي نحس ولا اي كلام.

في مجتمعنا أصبحت نظرتنا للمطلقة وخاصة لو معاها اولاد نظرة سيئة ومحدش بيرضي يتجوزها ، واللي بيفكر يتجوزها بيحسبها جوازة رخيصة متتكلفش ، تفكير غير ناضج وغير سوى ، ولله الأمر من قبل ومن بعد .

صباح الخير اهلا وسهلا بيكم ، عجبا ...الحياة بتستمر رغم موت إنسان عزيز ...رغم المشاكل اللي بنمر بيها ... رغم حاجات كتير ...بنقدر نستمر ...في مشاكل احيانا بنقول ان دي اللي حتنهي حياتنا وبتقول خلاص ، لكن بنقدر نستمر ، حياة الإنسان عجيبة فعلا ، وربنا خلق ليه قدرة عجيبة أنه يقدر ينسي ويقدر يتعامل مع مستجدات الحياة .

صباح الخير ...ربي يحفظكم ويبارك ليكم في حياتكم .