ساعة عصرية

ساعة عصرية 

حكاوي بالعامية 

الحلقة الثالثة والثلاثون 

بقلم : محمد فتحي شعبان 

اهلا وسهلا بكم وأسعد الله حياتكم ...

يعني لسة مع حكاوي بالعامية ساعة العصرية ، ركز معايا عشان الكلام اللي جي متشابك ومتداخل ...قبل كدة اتكلمت عن سقوط المنظومة ، ووجود الفساد في المجتمع ، وثقافة المهزوم ..تمام ..تمام ...خليك معايا بقي ..

مفيش بلد علي مستوي العالم مفيهاش فساد ، سواء كان ظاهرا أو باطنا ، فقط بتختلف النسبة ، في بلاد منتشر فيها الفساد في كل شىء وفي بلاد بنسب أقل ، لكن لا بد من وجود فساد ، يعني دي حاجة مفيهاش خلاف ، الفساد ملوش دعوة بالتقدم العلمي أو التقدم التكنولوجي ، لأنه قضية أخلاقية الوازع الديني فيها مهم جدا ، وجود الرقابة مهم كمان لكن رقابة الإنسان لنفسه اهم ، لانه بمعني آخر مهما كان في رقابة لازم حيكون في فساد ، إلا إذا راقب الإنسان ربه في تصرفاته ، لأن الفساد قضية أخلاقية ، ربنا سبحانه وتعالي قال في كتابه ( يا أيها الناس اتقوا ربكم الذي خلقكم من نفس واحدة وخلق منها زوجها وبث منهما رجالا كثيرا ونساء واتقوا الله الذي تساءلون به و الأرحام إن الله كان عليكم رقيبا ) النداء هنا موجه للناس كافة مسلم وغير مسلم ، الناس عموما مأمورين بمراقبة الله ..معايا ولو انتفت المراقبة حينتشر الفساد في كل شىء ، القضية هنا قضية عامة فكان النداء للجميع ، مهما كانت الدول متقدمة علما أو صناعيا وتكنولوجيا حيكون في فساد ، مش لان احنا دول عالم ثالث عندنا فساد لأ وفي الدول اللي بيقولوا متقدمة ، مع اني مش مع مصطلح دول العالم الثالث مش مقتنع بيه لأننا أساس التقدم العلمي والتقني في العالم ، لكن ثقافة المهزوم ، احنا مع ابتعادنا لفترة عن السير إلي الأمام تقدم من حولنا وتأخرنا نحن ، وده كان نتيجة عوامل سياسية ، لما حصل الغزو والاحتلال الفرنسي وده كان أول غزو في العصر الحديث لدول المشرق الإسلامي ، الناس حصلت لها حالة صدمة حضارية ، لقوا الغرب اتفوق عليهم لأنهم قاموا بتطبيق علوم الشرق أو بمعني تاني اخرجوا العلوم من حيز الكتب لأرض الواقع ، حصل هنا انهزام نفسي، الشعوب انصدمت احنا وصلنا لإيه ، الناس دي تقدمت واحنا رجعنا لورا ، البعض حاول يتخطي الأمر وأنه يتقدم يراجع نفسه ويصلح عيوبه ، والبعض اتبع الغالب وبقي ذيل ليه ، والبعض انهزم خالص ساب نفسه واتخلف اكتر وسقط خالص ، بنشوف كتير وبنسمع اكتر .

احنا كمجتمع شرقي متمسك بدينه وهذا هو المفترض المفروض نسبة الفساد تبقي أقل لكن ...اللي حاصل أن في حالة إنهيار اخلاقي وده شىء ملحوظ مش محتاج تدقيق ، نرجع تاني وجود فساد في أماكن مهمة المفترض أن ميكونش فيها فساد بأي شكل من الأشكال ، زي مثلا فساد التعليم  اللي ادي الي سقوط منظومة الاخلاق ، يعني لما الطفل والشاب يطلع يلاقي المدرس بيمد أيده وياخد فلوس ، لما يلاقي نفسه بينجح من غير ما يذاكر ، بس المهم يدفع ، الشرطة ومش حتكلم ربنا يجعل كلامنا خفيف عليهم ، المهم يعني كل واحد فاهم ..

معايا ولا لأ ...اللي أقصده أن إحنا عندنا فساد مش لأننا دول درجة ثالثة ولكن لأننا انهزمنا ...انهزمنا أخلاقيا لما فقدنا المراقبة النفسية يعني أن أنا اللي اراقب نفسي لاني عارف ان ربنا بيراقبني ...بس خلاص كده