ساعة عصرية

                      ساعة عصرية 

                    حكاوي بالعامية 

              بقلم : محمد فتحي شعبان 

              الحكاية الرابعة والثلاثين 

صباح الخير يا اهل الخير ، حفظ الله الجميع وبارك في حياتكم ، اسال الله سبحانه أن يحفظكم ويحفظ من تحبون .

أما بعد : 

في الفترة الأخيرة دي ، الأيام اللي عدت في تريند اتشهر جدا ، تريند البنت اللي جامعة أسيوط وتريند الدكتور الجامعي اللي بيرقص في حفل التخرج ، الموضوع عادي ناس فرحانيبن وبيهيصوا عادي جدا ، وكمان الطالبة اللي كانت بترقص علي مهرجان ،كان رقصها صبياني مفيش فيه اي إغراء ، مش لابسة بدلة رقص وبترقص ، واحدة فرحانة وبتعبر عن فرحتها ، كمان الدكتور هو مش بيرقص بصفته دكتور ، مش ماسك شهادة الدكتوراة في أيده وبيرقص بيها يعني ، هوة بيرقص بصفته إنسان بيشارك الناس فرحتها 

الموضوع بسيط لكن ...الناس بتحب تعلق علي كل حاجة ويكأنهم فاضيين وكملين المعاني .

كمان بقي الاخت المنقبة اللي بيترقص يوم دخلتها وفستان الفرج ضيق جدا فرحانة عادي ، فيه اكتر من فيديو نزل بالطريقة دي ، التعليقات والمشاهدات عالية جدا ،وطبعا كل الناس عايزة تشوف ، أشووووفه .

خلينا نتكلم مع بعض كدة ، خد راحتك في القعدة ، اخبارك ايه كويس ، الحمد لله انك كويس ، أحمد ربنا أنه عافاك من حاجات كتير ، حنتكلم في العموم مش علي حالات معينة ، البعض من الحالات دي بيبقي قاصدة أو بيحاول إن الموضوع يبقي تريند ويتشهر ويستفيد من الشهرة دي ...وزي ما بيقولوا الناس اتجنت وعايزة فلوس بأي شكل أو عايزة تتشهر باي شكل ،وتستفيد من الشهرة ، فالناس دي احنا بنساعدها تتشهر ، تمام في ناس تانية بتتصور بشكل عفوي وناس بتنشر فيديوهاتها بقصد التشهير أو التريند للمصور مش للي اتصور ، وبتسبب فضايح للناس دي ، وبتسبب لهم اذي كبير في حياتهم ، طبعا بتختلف الحالة .

طبعا الموضوع بيبقي فيه لبس كبير انت مش عارف مين عايز ايه ، لكن حاول متشغلش بالك.

حنتكلم في حاجة كدة ...إن سمعت اي حاجة وحشة عن حد ، خليها تقف عندك ما تحكيش لحد إلا إذا كان الأمر في ضرر كبير علي حد تاني ، حاول تستر اللي سمعت عنه أو شوفته ، الله سبحانه وتعالي ستير بيحب الستر .

سمعت إن في وزارة جديدة وحكومة جديدة ، أنا مش بتابع سياسة ومعرفش عنها حاجة لكن ربنا يولي من يصلح ، ده اللي نقدر نقوله .

الدعاء هو العبادة ...لا احمل هم الإجابة ولكني احمل هم الدعاء...ادعوا الله وانتم موقنون بالإجابة ...إن الله لا يجرب لما تتعامل مع ربنا اتعامل معاه بيقين تام ، ادعي واطلب أنت بتطلب من الملك بتطلب من الغنى ، بتطلب من الكريم ، بتطلب ممن بيده مقادير كل شىء ،،له القدرة المطلقة ...من الحاجات الجميلة اللي قريتها معني اسم الله الكريم ...هو الذي يعطي ابتداء  بلا سبب وبلا طلب وبلا استحقاق ، يعطي لانه كريم وليس لأنه يعطي فهو كريم  ، هو كريم في ذاته لا يحتاج إلي اسباب.

لما تتعرف علي اسماء الله وصفاته مفهومك عن الدعاء حيتغير ، لانك حتعرف معاني الاسماء ومدلولها ، لما تيجي تدعي بتبقي حاسس بمعني الكلام ، الرسول عليه الصلاة والسلام قال في حديثه ( إن لله تسعا وتسعون اسما من احصاها دخل الجنة ) طبعا احصاها ليها معني غير حفظها ، فاهم مش حافظ ، يعني درستها وعرفت معانيها ومدلولها .

أسعد الله حياتكم ..