ساعة عصرية حكاوي بالعامية

ساعة عصرية حكاوي بالعامية 

بقلم : محمد فتحي شعبان 

مساء الخير ، أسعد الله حياة الجميع 

شعور بالخنقة صعب جدا لدرجة اني مش عايز أكتب حاجة ، ولا عايز اقرا ولا عايز حاجة في أي حاجة ،ممكن يكون سببه حالة الرتابة اللي الواحد عايشها ، اصحي الساعة تلاتة ونص قبل الفجر ، انزل علي الوكالة ، شغال لحد المغرب ، اروح اصلي العشا اقرا شوية ، اتعشي انام ، اصحي الساعة تلاتة ونص قبل الفجر ، انزل الوكالة ، نفس الوشوش نفس الكلام ،نفس أي شىء هوة هوة ، ارجع البيت بعد المغرب ، اصلي العشا اتعشي اقرا انام ،مفيش أي تغيير ، ونفس الأمر بيتكرر لمدة سنة ، يعني أنا باخد اجازة في العيد بس ، حالة ملل ، بقالي كام يوم مش عايز اعمل اي حاجة ، بفتح الكتاب بحس إن تايه ، إن بدأت الكتابة مش بكمل الموضوع ، ساعات بنلاقي نفسي بنتكلم كتير في موضوع تافه ، أو بنسكت فجأة ومش بنكلم حد ، فيه حاجة غلط .

السوق أنا بنحب نتفرج علي الناس اللي رايحة جاية في السوق ، في فترة الهدنة كدة يعني ما بين الاصطباحة والتمسية أو اخر النهار ، بتبقي متابع احداث السوق والحكايات اللي بتدور في السوق ، يمكن لو حد منكم قرأ يوميات من سوق زينب حيعرف الكلام ده ، السوق مليان حكايات ملهاش اخر ، يعني ممكن تكتب روايات من السوق، لكن أنا بحب المشاهدة في صمت .

انا طبعي براوي شوية يعني مش بحب اختلط بالناس ، رغم اني طبيعة شغلي كلها خلطة بالناس ، ولأن ده عكس طبعي فبحس  بالخنقة  ساعات كتير ، حاجات كده عكس بعضها ، مش عارف اقولها ازاي ، أنا ساعات بحكي كتير مع الناس اللي حواليا عشان اطلع بقصة أو حكاية ، ساعات بعيش معاهم تفاصيل حياتهم ، ساعات برغي كتير اوي علي غير عادتي ، ساعات بحس إن السيستم عندي هنج ، الشبكة وقعت .

النهاردة كان في معركة في السوق ، مش مشاجرة دي معجنة علي رأي محمد هنيدي ، أنا طبعا متحركتش من مكاني ، اتنين في العناية المركزة غير الإصابات التانية ، وطبعا الشرطة جت بعد ما الموضوع خلص ، لمت الناس ومشيت ، يعني الموضوع عادي جدا ، محدش بيجري علي الشر لكن احيانا بيجي الشر لحد عندك فلازم تستقبله وترد عليه ، انا ساكن في منطقة إن مكنتش شديد وتقدر تاخد حقك بدراعك متعرفش تعيش فيها ، يمكن دي حاجات عجيبة وعكس طبعي لكن ...وتحتيها مية خط ، لازم الناس تعملك حساب ولازم يكون ليك انياب ومخالب ، عشان محدش بيرحم حد ، عرف السوق وعرف الحي اللي عايش فيه لازم تكون ليك انياب ومخالب وقت الجد لازم تظهر .

حالة الخنقة مش عايزة تروح ، يمكن لأني عايش حياة عكس بعضها ، أنا مش عارفني أنا تهت مني انا مش أنا ، والله صدق ، لا شكلي شكلي ولا دي ملامحي ولا ده انا ، الموضوع كبير فعلا ، أنا بعاني من الموضع ده ، احساسي أن أنا مش انا .

صباح الخير بعد الظهر أو مساء الخير الصبح كل الامور زي بعضها مفيش فرق ، الصبح زي الليل زي الظهر زي العصر ، تامر زي فارس ، نادية زي حسنية .