خمسة فضفضة

خمسة فضفضة 

بقلم : محمد بن فتحى شعبان 

   يا اهلا وسهلا يا تلتميت مرحبا يا كوم مراحب ، الحكاية وما فيها والله ما عارف ايه اللي فيها ، المواضيع أصبحت متداخلة مع بعضها البعض واصبحنا سمك لبن تمر هندي ، من مع من و من ضد من .

   المهم ...موضوع احمد الفاتح الشاب الجزائري الذي حمل ثم ولد ثم مات نتيجة لمضاعفات الحمل والولادة ، هو عمل عملية تحول ثم قام بعملية تلقيح صناعي ليحمل ، طب ما كان معملش عملية التحول اللي فهمته أنه كان ست وبعدين اتحول راجل وبعدين حبل طب كان فضل ست زي ماكان وكان حبل وولد ، طب يعني في ايه الموضوع مش راكب علي بعضه في حاجة غلط ، ايه الهم اللي احنا فيه ده احنا فاضيين لاحمد الفاتح ده كمان .

   واحد اتجوز واحدة وطلقها بعد أربعة وعشرين ساعة ولا بعد يومين ، مطرب اتجوز وطلق الله اعلم ولا مطلقش الدنيا انقلبت والكل بيتكلم طب احنا مالنا ايه اللي دخلنا ما يطلق ولا ميطلقش احنا ملناش فيه ، شعب حشري حاطط مناخيره في كل حاجة ، اه والله بجد حتي في حياتنا خاصة في المناطق الشعبية ما حدش بسيب حد في حاله ، اللي اتخطبت دي يا اختي صغيرة والعريس ده كبير او دا العريس احلي منها أو يا اختي دي خسارة فيه ويا تري حتجوز في بيت عيلة ولا حيجيبلها شقة لوحدها ، وتلاقي كلام مالوش اول من آخر ولو واحدة سنها كبر بقي ومتجوزتش اهي بقت عانس عشان لسانها طويل ، يا تري متجوزتش ليه في حد ضاحك عليها ، ولا معمول لها عمل ، وفي الاخر احنا مالنا دع الخلق للخالق ماكان من الاول قبل ما تيجيبوا سيرة خلق الله ، ولا بقي واحدة تتجوز ورايحين يفرشوا شقتها اسمع العجب العجاب وفي الاخر دع الخلق للخالق .

   معلش احنا بنتكلم ( الدعارة الحديثة ) اه زي ما قريت كدة النسوان والبنات اللي بتتعري وبترقص وبتعمل اغراء ( اغريه يا سكيينة ) علي مقاطع التيك توك والبلاوي اللي بتحصل دي دعارة بشكل حديث ومفيش اي مبرر لا ظروف مالية ولا اقتصادية تجوع الحرة ولا تأكل بثديبها أما دلوقت حدث ولا حرج مجرد اي ضغط ممكن تاكل باي حتة المهم تاكل .

   يا جدعان سبوني ساكت اصل انا عارف لساني ده حيوديني في داهية ...ما يحدث في غزة وغيرها من بلاد المسلمين ...وما قامت به السعودية والإمارات من دفع الأموال لترامب ..لن اقول سوي الله المستعان علي ما تصفون .